गोसाइकुण्ड रसुवाको तत्कालिन स्याफ्रु गाविस भित्र पर्ने सुन्दर स्थानहो जुन लाङटाङ्ग रास्ट्रिय निकुञ्ज भित्र पर्दछ । यसकालागि सुन्दरीजलहुदै गोल्फु भञ्ज्यांग, कुटुमसाङ्ग हुदै जाने बाटो, मेलम्चीहुदै जानेबाटाहरु पनि छन् । पानी प्रशस्त भएको हेलम्बु क्षेत्रबाट अहिले काठमाडौ पानी लगिदै छ । यहि स्थानबाट उकालो लाग्ने एउटा बाटो जान्छ जहाँ सफा तथा सुन्दर खोलाहरु मेलम्ची खोलातिर बग्छन् । यहि खोलाको किनार हुदै गोल्फू भञ्यांगको बाटो लाग्छ भने कच्ची बाटोले जोडिई सकेको गोल्फूको बाटोमा हिउदमा बस सेवा सञ्चालनमा हुने गर्दछ छ । गोल्फूको बाटोमा रहेको ग्याल्थुम बजारमा धेरै शुलभ र मीठो खाना खान र बस्नको लागि कोठा उपलब्ध हुन्छ ।

यहिउकाली चढेर गोल्फुभञ्ज्यांग पुगिन्छ भने यो शरद ऋतुको समय विभिन्न किसिमका जंगलीफूलहरु फूलेर यो बाटो नै सुन्दर बनाएको हुन्छ ।

त्यहाबाट मेलम्ची – काठमाडौ खानेपानीको टनेल हुदै उकालो २ घण्टा हिडेपछि गोल्फुभञ्ज्यांग पुगिन्छ । जुन नुवाकोट जिल्लाको तत्कालिन बेतेनी गाबिसको एउटा सानो बजार हो । जहाँ हरेकदिन गोसाईकुण्ड यात्रा आउने जाने आन्तरीक तथा बाह्य पर्यटकको घुँइचो हुन्छ । एक रात बसेर रमाइलो गर्नकालागि यो स्थान पनि साह्रै उपयुक्त छ । यहाँ बाट गोसाईकुण्डको पूर्ब पाटा देखिन्छ ।

कुटुमसांङ्गबाट फेदिहुदै लगभग २ दिनको यात्रा पछि गोसाईकुण्डको माथिल्लो भागमा पुगिन्छ जहाँ सूर्यकुण्ड रहेको छ भने यसको उचाई ४७०० मिटर रहेको छ । उच्च क्षेत्र भएका कारण यहाँ अक्सिजनको कमिले गर्दा सरासर हिड्न गाह्रो हुन्छ । बर्षाको समयमा जम्माहुने पानी, हिउदको हिउँ र थोरै इभ्यापोरेशनका कारण पानी संधै यहाँका कुण्डहरुमा भरि देखिन्छ भने पानीको श्रोतबाट पनि निरन्तर बगिरहेको हुन्छ ।

जम्मा १०८ वटा साना तथा ठूला कुण्ड रहेको यो स्थानमा बिहान ११ बजे सम्म खुल्ला रहेको आकाश मध्यान्हमा हुस्सुभित्र हराउँछ । सूर्यकुण्डबाट गोसाईकुण्ड लाग्दाको तेर्सोबाटो साह्रै नै सुन्दर छ । पर बरदान कुण्ड त्यहाँ माथि पहाड अनिपारि गणेश हिमाल टलक्क टल्किन्छ ।

लगभग १ किमीको दुरीपार गर्दा ८–९ वटा साना ठूला कुण्डहरु भेटिईन्छन् अनि पुगिन्छ गोसाईकुण्ड जुन ४३०० मिटर उचाईमा रहेको छ भने तीनवटा पानीको मुहानबाट पानी निरन्तर कुण्डमा गइरहेको देख्न सकिन्छ भने सोहि मुहान महादेवले बिषको असर कमगर्न त्रिशुलहानेर निकालेको जनविश्वास हिन्दु धर्मालम्बिहरुमा रहेको छ जसको कारण खोलाको नाम त्रिशुली रहन गएको हो । यहि स्थानबाट मानिसहरुले जल लाने गर्दछन् । यो स्थानको तापक्रम निकै नै कम रहेकोछ त्यसैले बिहानपख पानी जमेको हुन्छ । खान र बस्नका लागि तीन चारवटा होटलहरु पश्चिम किनारामा रहेको छ ।

यो कुण्ड निकै ठूलो छ जसको नजीक माथितिर तीनवटा सानासाना कुण्ड संगसगै रहेको छ भने यो कुण्डलाई एक फन्को मार्नका लागि एक घण्टा समय लाग्छ । यहाँ यातायातको सुविधा नभएकोले घोडा र खच्चरबाट सामान ढुवानी गरिन्छ ।

यस कुण्डको ठीक मुनि भैरबकुण्ड रहेको छ भने अन्तिम कुण्ड सरस्वती कुण्ड हो । भैरबकुण्ड सबैभन्दा गहिरो कुण्ड हो यो लगभग पाँच बिघा क्षेत्रफलमा फैलिएको छ । मानिसहरु यस कुण्डमा लुकेको नागले तान्ने जनविश्वासका कारण स्नान गर्दैनन् । रसुवाको राम्चे अनि बेत्रावती तिरबाट पैदल आउनेबाटो यहाआएर मिसिन्छ । गोसाईकुण्डको पानी भैरबकुण्ड हुदै सरस्वतीकुण्डमा खस्दछ र त्यसबाट निस्किएको पानीबाट एउटा सुन्दर झरना बन्दछ । यहि महादेवले त्रिशुल हानेर निकालेको पानी खोला भएर बगेपछि यसको नाम त्रिशुली रहन गएको स्थानीयको भनाई छ ।

यस कुण्ड देखि लगभग ३ घण्टा पश्चिम हिडेपछि करिव ३९०० मिटरको उचाईमा लौरीबिना पर्दछ जहाँ तीन चारवटा होटल रहेको छ र त्यस भन्दा मुनि चोलांङ पाटी अनि सिंगुम्बा रहेको छ । सिंगुम्बामा अवस्थित चीज फ्याक्ट्रिबाट उत्पादित चौरीको चीज राम्रो गुणस्तरको रहेको छ जुनकिनेर खानपनि सकिन्छ । यस स्थानहरुमा पसल भित्र टोपी स्वेटरहरु बिक्रीकालागि राखिएका हुन्छन् । गोसाईकुण्ड भित्रकुनै मोबाइलले कामगर्दैन भने अन्य स्थानमाएन सेलको फोन प्रयोग गर्न सकिन्छ । यहि देउराली तिर जाने ओह्रालो बाटो हुदै धुञ्चे पुगिन्छ ।

यस धुन्चेबाट काठमाडौ जाने तीनवटा बाटाहरु रहेका छन् । पहिलो रानीपौवा हुदै काठमाण्डौ जाने, अर्को धादिंग गल्छी हुदै थानकोट जानेछ भने अर्को शिवपुरीबाट पनि काठमाण्डौ जान सकिन्छ । धुन्चेबाट काठमाडौ जानेबाटोमा साह्रैसुन्दर खोलाहरु भेटन सकिन्छ भने अर्को तर्फ रसुवा गढीतिर जाने बाटो रहेको छ ।

बिदेशी पर्यटक मात्र नभएर आन्तरिक पर्यटकहरुको चाप पनि अहिले उत्तिकै देखिने यो ठाउमा गणेश हिमाल र लाङटाङ हिमाल अर्को सुन्दर गन्तब्यहरु हुन् । नोभेम्बर महिनापछि यस स्थानका रमणीय स्थानहरुमा यात्रा असम्भब हुन जान्छ भने मार्च अप्रिल देखि पुन ः यात्राकालागि उपयुक्त वातावरण बन्न जान्छ । विभिन्न रंगका गुराँस फुल्ने यो स्थान त्यस समय अझ सुन्दर देखिन्छ ।

क्लिक चौतारीका लागी फोटो पत्रकार
हेमन्त चेम्जोङ्ग, धनकुटा