आज एक कार्यक्रमका विच सिन्धुली जिल्लाको गोलजोर गाँउपालिका अवस्थित खुर्कोटबाट यातायात व्यवस्था कार्यालयले सेवा प्रारम्भ गरेको छ । प्रदेश सरकार अन्तर्गत श्रम, रोजगार तथा यातायात मन्त्रालयका मन्त्री घनश्याम दाहाल सहित मन्त्रालयका सचिव नेत्र सुवेदीले ना १ ज ६२४७ नम्बरको टाटा सुमो जिपका चालक ओमबहादुर खत्रीलाई पटके बाटो इजाजत पत्र दिँदै सेवा शुभारम्भ गर्नु भएको हो ।
सेवाग्राहीहरूको समस्यालाई ध्यानमा राखी २ देखि ३ वर्ष कुर्ने बाध्यता हटाउँदै १५ दिनमा लाइसेन्स बनाउने व्यवस्था गरेको मन्त्री दाहालले बताउनुभयो । सेवाग्राहीको काममा छिटो भन्दा छिटो दिई, ढिलासुस्ती नगरी काम गर्न उहाँले कर्मचारीहरूलाई निर्देशन दिनुभयो ।
कार्यक्रममा प्रदेश सभा सदस्य प्रदीप कटुवाल, लेखनाथ दाहाल, गोलञ्जोर गाउँपालिका अध्यक्ष शङ्कर बराल, सुनकोसी गाउँपालिका अध्यक्ष दिपा दाहाल लगायत जनप्रतिनिधि, स्थानीय राजनीतिक दलका प्रतिनिधि र स्थानीयको उपस्थिति रहेको थियो ।
यातायात व्यवस्था कार्यालय स्थापना भएपछि यातायातका साधनको नवीकरण, लाइसेन्स नवीकरण लगायतका काम अब खुर्कोटबाटै हुने भएको छ । सिन्धुलीको महाभारत उत्तरी क्षेत्र सहित, रामेछाप , दोलखा , काभ्रे र प्रदेश १ ओखलढुङ्गा , खोटाङ , सोलुखुम्बु , भोजपुर र उदयपुरका नागरिक लाभान्वित हुनेछन् ।
