सिन्धुली, साउन १६ । सिन्धुलीको हरिहरपुरगढी गाउँपालिका–१, बस्तीपुरमा शुक्रबार दिउँसो भएको एक दर्दनाक दुर्घटनामा दुई बालबालिकाको मृत्यु भएको छ भने तीन जना गम्भीर घाइते भएका छन्। लगातारको वर्षापछि पहिरोसँगै ढलेको सालको रुखले स्थानीय टहरोमाथि खस्दा यो दुर्घटना भएको हो ।
घटनाको समयमा ती बालबालिका भीषण वर्षाबाट जोगिन स्थानीय एउटा टहरोभित्र ओत लागिरहेका थिए । तर पहिरोले उखेलेको सालको रुख सीधै टहरोमाथि ढल्दा उनीहरू त्यसैको चपेटामा परे । घटनास्थलमै १६ वर्षीया सन्ता गोले र ९ वर्षीय सार्की थिङको ज्यान गएको जिल्ला प्रहरी कार्यालय सिन्धुलीका प्रवक्ता डीएसपी सूर्यप्रकाश सुवेदीले जानकारी दिए ।
घटनामा गम्भीर घाइते भएकामध्ये १४ वर्षीया सिर्जना माया र १५ वर्षीया सन्ध्या भोलनलाई प्राथमिक उपचारपछि थप उपचारका लागि हेटौंडा रेफर गरिएको छ । अर्का घाइते ७ वर्षीय सुशील थिङको स्थानीय पाँचपाण्डव पोलिक्लिनिक, झुरझुरेमा उपचार भइरहेको प्रहरीले जनाएको छ ।
घटनापछि स्थानीयवासी र प्रहरीको सहयोगमा उद्दार कार्य तुरुन्तै सुरु गरिएको थियो । घटनास्थलको मुचुल्का तयार पारिएको र प्रारम्भिक आवश्यक अनुसन्धान कार्यसमेत सम्पन्न गरिएको प्रहरीले जनाएको छ । मृतक दुवै जनाको शव पोस्टमार्टमका लागि प्राथमिक स्वास्थ्य केन्द्र कपिलाकोट पठाइएको डीएसपी सुवेदीले बताए ।
स्थानीयवासीहरूका अनुसार ती किशोर–किशोरीहरू बस्ती नजिकैको खोंचमा रहेको टहरोमा वर्षाका कारण बसिरहेका थिए । तर उनीहरूले कल्पनासमेत नगरेको विपत्ति उनैको ओत लाग्ने थलोमै आइपुग्यो। हाल घटनाबारे थप अनुसन्धान भइरहेको छ भने परिवारजन र गाउँलेहरूमा शोक छाएको छ ।
