जिल्ला अदालत सिन्धुलीले आर्थिक वर्ष ०८१/८२ मा ८७४ वटा मुद्दा फस्र्यौट गरेको छ। सम्बन्ध विच्छेद, अंशबण्डा, जबर्जस्ती करणी लगायतका मुद्दा प्रमुख रूपमा फस्र्यौट भएका छन्।
Advertisement
सिन्धुलीमाढी, साउन १९ । जिल्ला अदालत सिन्धुलीले एक बर्षमा ८७४ वटा मुद्धा फस्र्यौट गरेको छ । गत आर्थिक बर्ष (आ.ब) ०८१/०८२ मा अघिल्लो आब ०८०/०८१ बाट जिम्मेवारी सरेर आएका सहित एक हजार ५३३ वटा मुद्धा दर्ता भएका थिए । ती मध्ये ८७४ वटा मुद्धा फस्र्यौट भएको र बाँकी रहेका ६५९ मुद्धा चालु आर्थिक बर्ष ०८२/०८३ का लागि जिम्मेवारी सरेर आएको अदालतले जनाएको छ ।
अदालतका अनुसार आब ०८०/०८१ मा कुल रहेका एक हजार ७२७ मुद्धा मध्ये एक हजार ६८ मुद्धा फस्र्यौट भई बाँकी ६५९ गत आब ०८१/०८२ का लागि जिम्मेवारी सरेर आएका थिए । गत आबमा फस्र्यौट भएका मुद्धा मध्ये देवानीतर्फ ५३२ वटा, फौजदारी ३३५ वटा र रिट निबेदनतर्फ सात गरी ८७४ वटा रहेको अदालतका सूचना अधिकारी डेढकुमार ढकालले जानकारी दिनुभयो ।
चालु आर्थिक बर्षका लागि जिम्मेवारी सरेर आएका मध्ये देवानीतर्फ ३३१ वटा, फौजदारी ३२२ वटा र रिट निबेदनतर्फ छ रहेको उहाँले सुनाउनुभयो । उहाँका अनुसार गत आर्थिक बर्षमा देवानी ८६३ वटा, फौजदारी ६५७ वटा र उच्च अदालतका लागि रिट निबेदेन १३ गरी एक हजार ५३३ नयाँ मुद्धा दर्ता भएका थिए ।
गत आबमा फैसला भएका मुद्धाहरुमा सम्बन्ध बिच्छेद सम्बन्धि ३३२, जबर्जस्ती करणी सम्बन्धि ४८, लागू औषध सम्बन्धि ३७, सबारी ज्यान सम्बन्धि २६, अंशबण्डा सम्बन्धि ४३६ र चोरी सम्बन्धि ४० वटा लगायतका रहेका अदालतले जनाएको छ ।
गत आर्थिक बर्षमा जिम्मेवारी सरेर आएका दुई बर्ष माथिका २४४ मुद्धा मध्ये २१९ वटा फस्र्यौट भएको र अब २५ वटा बाँकी रहेको सूचना अधिकारी ढकालले बताउनुभयो । उहाँले भन्नुभयो, ‘अदालतको दुई बर्ष माथिका मुद्धा शुन्य पार्ने लक्ष्य रहेकोमा पक्राउ पुर्जी तामेलीमा समस्या आएर २५ थान मुद्धा बाँकी रहेको हो । ती मुद्धासँग सम्बन्धित अधिकांस प्रतिबादी बाहिरी जिल्लाका रहेका र पुलिसले समय नदिदा समस्या भएको हो ।’
