सिन्धुली, भदौ ८ । सिन्धुली जिल्लाका विभिन्न स्थानमा गत बर्षको बाढी पहिरोबाट क्षतीग्रस्त ४९ वटा खानेपानी योजना मर्मत गरी सञ्चालनमा ल्याईएको छ ।
गत बर्ष असोज ११ र १२ गतेको अबिरल बर्षापछिको भिषण बाढीपहिरोबाट क्षतीग्रस्त ती खानेपानी योजना नेपाल स्वास्थ्यका लागि पानी (नेवा)ले स्थानीय सरकारको साझेदारीमा मर्मत गरी सञ्चालनमा ल्याएको हो । नेवाले बनाएको बाढी पहिरोबाट क्षतीग्रस्त ती खानेपानी योजना आफैले मर्मत गरी सञ्चालनमा ल्याएको हो । सुनकोसी गाँउपालिका–२ स्थित कालिमाटी खानेपानी योजना नेवा र गाँउपालिकाको सहयोगमा मर्मत गरी सञ्चालनमा आएको स्थानीयले बताएका छन् ।
उक्त योजनाका अध्यक्ष ध्रुब चौलागाई नेवाको पाँच लाख २१ हजार ८० रुपिया र गाँउपालिकाको ८५ हजार ५७० रुपिया गरी कुल छ लाख छ हजार ६५० रुपियाको लागतमा योजना मर्मत गरी सञ्चालनमा ल्याएको बताउनुहुन्छ । ‘बाढीपहिरोले मुहानमा ईन्टेक पुरै बगाएको थियो, अहिले त्यहा नयाँ ईन्टेक निर्माण गरी ग्याभिन जालि र वरिपरी तारजालीले घेराबेरा गरी संरक्षण गर्ने काम भएको छ,’ उहाँले भन्नुभयो, ‘पहिरोले बगाएको पाईप लाईनमा पनि जिआई पाईप र पोलिथिन पाईप हालेर मर्मत गरेका छौं ।’
उहाँका अनुसार योजना मर्मतपछि अहिले ७० घर परिवार, एउटा विद्यालय र एउटा मन्दिरमा खानेपानी सुविधा पुगेको छ । ‘एक घर, एक धारा’ योजना अन्तर्गत उक्त योजना करिब पाँच बर्षअघि नेवाले नै निर्माण गरेको थियो । त्यस्तै फिक्कल गाँउपालिका–५ मा पनि बाढीपहिरोबाट क्षतीग्रस्त अर्थुङ्गे खानेपानी योजना र बाँझागाँउ खोलाखर्क खानेपानी योजना मर्मत गरी सञ्चालनमा आएका छन् ।
नेवा र स्थानीय सरकारको साझेदारीमा योजना मर्मतपछि अर्थुङ्गे खानेपानी योजनाबाट एक विद्यालयसहित १२ घर परिवार र बाँझागाँउ खोलाखर्क खानेपानी योजनाबाट १८ घर परिवारलाई खानेपानी सुविधा उपलब्ध भएको उक्त वडाका अध्यक्ष बैकुण्ठलाल पहाडीले जानकारी दिनुभयो । उहाँले भन्नुभयो, ‘दुबै योजनाको मुहान चाल्ने खोलाको तलमाथि हो । बाढी पहिरोले बगाएको,ट टुट्फुट भएको ठाँउमा पाईप लाईन फेरेर योजना मर्मत गरी सञ्चालनमा ल्याउने काम भएको छ । दुबै योजना १५ बर्षअघि नेवाले नै बनाएको थियो ।’
अर्थुङ्गे खानेपानी योजना मर्मतका लागि नेवाको दुई लाख २४ हजार २२१ रुपिया र गाँउपालिकाको ४० हजार ५७० रुपिया खर्च भएको छ । त्यस्तै बाँझागाँउ खोलाखर्क खानेपानी योना मर्मतका लागि नेवाको तीन लाख २९ हजार २९२ रुपिया र गाँउपालिकाको ६८ हजार २०३ रुपिया खर्च भएको नेवा प्रदेश कार्यालय सिन्धुलीले जनाएको छ ।
गत बर्षको भिषण बाढी पहिरोले सिन्धुली जिल्लामा क्षतीग्रस्त ४९ खानेपानी योजना मर्मत गरी सञ्चालनमा ल्याउन नेवाको ९३ लाख २० हजार १५१ रुपिया र स्थानीय सरकारको साझेदारी १५ लाख ३२ हजार ६१६ रुपिया गरी एक करोड आठ लाख ५२ हजार ८४१ रुपिया खर्च भएको कार्यालय प्रमुख भरतप्रसाद भट्टले जानकारी दिनुभयो ।
नेवाले बनाएको बढीपहिरोले क्षती भएका खानेपानी योजनाहरु नेवा आफैले स्थानीय सरकारको साझेदारीमा मर्मत गरी सञ्चालनमा ल्याएको उहाँले बताउनुभयो ।
उहाँका अनुसार उक्त बाढी पहिरोका कारण प्रभावित सिन्धुली र काभ्रेपलान्चोकमा गरि जम्मा ६० वटा योजनाको मर्मत सम्भार गरिएको छ । अन्य पाँच वटा सञ्चालनमा नरहेका आयोजनाको समेत पुर्ननिमार्ण गरिएको छ । ती सम्पन्न योजनाहरुबाट दुई हजार चार सय पचहत्तर घर धुरीमा धारा निमार्ण गरि खानेपानी सुविधा उपलब्ध भएको छ ।
