सिन्धुली, भदौ ८ ।
अस्पतालका मेडिकल सुपरिटेण्डेन्ट (मेसु) डा. अभिषेक थपलियाले बिरामी बढ्नुको कारण ‘सिजनल फ्लु’ भएको जानकारी दिनुभयो । उहाँले भन्नुभयो, ‘अहिले बिरामी दैनिक ओपिडीमा चारदेखि पाँच सय जनासम्म र ईमर्जेन्सिमा ४० देखि ५० जनासम्म आई रहेका छन् ।’ धेरै जसो बिरामी ज्वरो, टाईफाईड, झाडापखला, दम रोगका रहेका पनि उहाँले बताउनुभयो ।
मेसु थपलियाका अनुसार सिन्धुली अस्पतालमा विभिन्न रोगको सल्यक्रिया गर्ने क्रम पनि बढेको छ । विगतका दिनमा सल्यक्रिया गर्न राजधानी काठमाण्डौ र अन्यत्र जाने बिरामी पनि सिन्धुली अस्पतालमा आउन थालेकाले बिरामीको सङ्ख्या बढेको हो । सिन्धुली जिल्लाकै सबैभन्दा ठूलो स्वास्थ्य संस्था ‘सिन्धुली अस्पताल’ ले बिगत केहि बर्षदेखि बिशेषज्ञ चिकित्सा सेवा सुरु गरेसँगै बिरामीको आकर्षण बढेको छ ।
कमलामाई नगरपालिका–६ निवासी शिक्षक ध्रुब पहाडी झाडापखालाका कारण दुई दिनअघि अस्पतालमा भर्ना भई उपचार गरि रहेको बताउनुहुन्छ । उहाँले भन्नुभयो, ‘खै, खानपान नमिलेर त होला नी झाडापखाला भएको । भर्ना भएर उपचार गरि रहेको छु ।’
५० शैयाबाट क्षमता बिस्तार गरी एक सय शैया बनाईएको सिन्धुली अस्पतालमा ११ जना बिशेषज्ञ (कन्सल्टेन्ट) चिकित्सक, नौ जना मेडिकल अधिकृतको दरबन्दि रहेको छ । पाँच बर्षअघिसम्म बिरामीहरुलाई सेवा प्रवाह गरि रहेको जीर्ण पुरानो भवन भत्काई त्यही ठाँउमा अहिले चार वटा ब्लकमा अपाङगमैत्री (लिफ्ट) सहितको सुविधा सम्पन्न आधुनिक अढाई तले भवन निर्माण गरिए पनि त्यसले एक सय बेडको क्षमता धान्न सक्ने अवस्था नभएको अस्पतालले जनाएको छ ।
त्यस्तै राष्ट्रिय विमा बोर्डले सिन्धुली अस्पताललाई विमाको रकम समयमै भुक्तानी नगर्दा उक्त अस्पतालले सञ्चालन गरेको फार्मेसीबाट बिरामीले निःशुल्क पाउने औषधी पाउन सकिरहेका छैनन् । राष्ट्रिय विमा बोर्डले सिन्धुली अस्पताललाई दिनु पर्ने गत बर्ष भदौदेखि हालसम्मको बिमाको रकम करिब सात करोड रुपिया भुक्तानी नगर्दा औषधि खरिद गर्न नसकेपछि उक्त समस्या आएको अस्पतालले जनाएको छ ।
अस्पताल विकास समितिका अध्यक्ष शतिषचन्द्र ढकालले बिमा बोर्डले गत बर्ष भदौ देखि नै बिमाको रकम नपठाएको जानकारी दिनुभयो । उहाँले भन्नुभयो, ‘विमा बोर्डले अस्पताललाई एक लाख जनाभन्दा बढी बिरामीको करिब सात करोड रुपिया भुक्तानी दिन बाँकी रहेको छ । उक्त रकम नपाएर औषधी खरिद गर्न नसक्दा अस्पतालको फार्मेसी रित्तिदै गएको छ ।’
उहाँका अनुसार स्वास्थ्य विमा गरेका बिरामीले फार्मेसीबाट ९८ किसिमका औषधी निःशुल्क पाउदै आएकोमा अहिले अधिकांस औषधी सकिएको छ । अस्पतालको मुख्य आम्दानीको स्रोत नै बिमाको रकम भएकाले औषधि किन्न लगायतका सबै कुरा रोकिएको छ । अस्पतालमा उपचारका लागि दैनिक आउने बिरामी मध्ये आधाभन्दा बढी स्वास्थ्य बिमा गरेका बिरामी आउने गरेका छन् । जिल्लामा हालसम्म एक लाख ४३ हजार ३३३ जनाले स्वास्थ्य विमा गरेका छन् ।
अस्पतालको फार्मेसि औषधीको अभावमा रित्तिदै जाँदा बिरामीले सामान्य औषधि समेत बाहिरको औषधि पसलमा खरिद गर्नु पर्ने बाध्यता रहेको अस्पतालले जनाएको छ । यसअघि दुई/तीन महिनाको फरकमा उक्त रकम आउने गरेकोमा अहिले लामो समयदेखि नआउदा अस्पतालको दैनिक प्रशाससन समेत प्रभावित भएको छ ।
अस्पताल विकास समितिका अध्यक्ष ढकालले भन्नुभयो, ‘चिकित्सकलाई ईन्सेन्टिभ बापत दिनु पर्ने रकम समेत रोकिएको छ । पछि एक मुष्ट पाउन हुन्छ भनी फकाएर काममा लगाएका छौं ।’
