सिन्धुली, साउन २३ । सिन्धुलीको हरिहरपुरगढी गाँउपालिकाले किसानले पालेको घर पालुवा पशुहरुमा लम्पि स्किन रोग बिरुद्धको निःशुल्क खोप(भ्याक्सिन) लगाउन सुरु गरेको छ ।
उक्त पालिकाको वडा नं. १ को गढीबसेरी, २ को जखौली र ४ को भ्mयाडीमा किसानले पालेको पशुमा लम्पि स्किन रोग देखा परेपछि सो रोग बिरुद्ध साउन १६ गतेदेखि उक्त खोप अभियान सुरु गरिएको हो । पालिकाका सबै आठ वटै वडामा किसानले पालेको पशुहरुमा उक्त खोप लगाईने गाँउपालिकाले जनाएको छ ।
गाँउपालिका पशु शाखाका प्राविधिक बिपिनजंग राईले पशुहरुमा उक्त खोप लगाउन दुई जना कर्मचारी सहित छ जनालाई परिचालन गरेको जानकारी दिनुभयो । उहाँका अनुसार हालसम्म एक हजार पाँच सय पशुलाई उक्त खोप लगाई सकिएको छ ।
आवश्यक भ्याक्सिन गाँउपालिकाले उपलब्ध गराएको छ । ‘जिल्लाबाट पनि एक हजार चार सय पशुलाई पुग्ने खोप आएको छ,’ उहाँले भन्नुभयो, ‘वडा नं. २ र ३ को मदन भण्डारी राजमार्ग क्षेत्रमा खोप लगाई सकिएको छ । बर्खाले अबरोध नगरे साउन महिना भरिमा उक्त खोप लगाई सक्ने योजना छ ।’
झिँगा, भुसुना, लामखुट्टे विभिन्न किराको टोकाइबाट फैलिने यस रोगको सङक्रमणले पशुमा ज्वरो आउने, फोका निस्कने, गाँठागुँठी आउने, पशु वस्तुलाई कमजोर बनाउने र दुध उत्पादन घट्ने गाँउपालिकाले जनाएको छ । सङक्रमण फैलिन नदिन गोठ वरिपरि सफा राख्ने, जैविक सुरक्षामा ध्यान दिने, अन्य पशुसँग नराख्ने, चरनमा नलैजाने, पशु वस्तुको रोगसँग लड्ने क्षमता बढाउन खोप लगाउन किसानलाई सल्ला दिने गरिएको पशु प्राविधिक राईले सुनाउनुभयो ।
