सिन्धुली, साउन २८ । भौतिक पुर्वाधारका संरचना बालमैत्री नभएको गुनासाहरु बढी रहेको बेला सिन्धुलीको दुर्गम क्षेत्रमा रहेको तीनपाटन गाँउपालिका–७ स्थित भञ्ज्याङ्गाँउमा बालमैत्री खानेपानी योजना निर्माण गरिएको छ ।
तीनपाटन गाँउपालिकाको समन्वय र सिड्स नेपालको आर्थिक तथा प्राविधिक सहयोगमा उक्त वडामा सञ्चालित एकिकृत पोषण तथा उत्थानशिल जीविकोपार्जन परियोजना अन्तर्गत उक्त खानेपानी योजना निर्माण सम्पन्न भएको हो । निर्माण सम्पन्न भएपछि सोमबार उक्त योजना उपभोक्तालाई हस्तान्तरण गरिएको वडा कार्यालयले जनाएको छ ।
वडा अध्यक्ष युबराज पहाडीका अनुसार कुल १७ लाख ८२ हजार ४५१ रुपियाको लागतमा निर्माण सम्पन्न उक्त योजनाबाट २२ घर परिवारमा बालमैत्री धारा निर्माण गरी उपभोक्तालाई खानेपानी बितरण गरिएको छ । खानेपानी योजना सम्पन्न गर्न सिड्स नेपालको ११ लाख १५ हजार ८१५ रुपिया, वडा कार्यालयका दुई लाख ५० हजार र उपभोक्ताले चार लाख १६ हजार ६३६ रुपिया बराबरको श्रमदान गरेका छन् ।
‘नजिकै खानेपानीको मुहान नहुदा उक्त गाँउमा खानेपानीको चरम समस्या थियो,’ उहाँले भन्नुभयो, ‘बस्तिभन्दा तीन किलो मिटर टाढा कालिमाटी छेउको खोल्साबाट पानी ल्याई प्रत्येक घरमा बालमैत्री धारा निर्माण गरेर स्वच्छ खानेपानीको व्यवस्था भएको छ । धारामा चौबिसै घण्टा पानी आउछ ।’ योजना अन्तर्गत ईन्टेक, आरभिटी, पाईपलाईन बिस्तार र धारा निर्माण भएको पनि उहाँले जानकारी दिनुभयो । उहाँका अनुसार उक्त योजना निर्माणका लागि २०८१ माघ ३० गते सम्झौता गरी गत असार महिनामा सम्पन्न भएको हो ।
