सिन्धुली, भदौ १२ । बीपी राजमार्ग अन्तर्गत सिन्धुलीको गोलन्जोर गाँउपालिका–७ खुर्कोटमा लामो दुरीका सबारी चालकका लागि ‘रिफ्रेस सेन्टर’ पुनः सञ्चालनमा ल्याईएको छ ।
गत बर्ष असोज ११ गते सुनकोसी नदीमा आएको बाढीले क्षती गरेपछि बन्द भएको उक्त रिफ्रेस सेन्टर मर्मत गरी नजिकिदो चाडपर्वलाई लक्षित गरी बुधबारदेखि पुनः सञ्चालन गरेको जिल्ला प्रहरी कार्यालयले जनाएको छ । प्रमुख जिल्ला अधिकारी दिनेससागर भुसालले रिफ्रेस सेन्टर सञ्चालनमा सबारी दुर्घट्ना न्युनिकरणमा सहयोग पुग्ने बताउनुभयो ।
प्रहरी उपरिक्षक लालध्वज सुवेदीले समुदाय–प्रहरी साझेदारी कार्यक्रम अन्तर्गत खुर्कोटमा रिफ्रेस सेन्टर सञ्चालन भएको र सबारी साधन चलाएर थाकेर आएका सबारी चालकलाई उक्त सेन्टरमा केही समय आराम गराई गन्तव्यमा पठाईने बताउनुभयो ।
गोलन्जोर गाँउपालिकाका उपाध्यक्ष ज्वालाप्रसाद न्यौपानेले सुनकोसीको बाढीबाट क्षतीग्रस्त उक्त रिफ्रेस सेन्टर नेपाल प्रहरीको सक्रियता र खुर्कोटबासीको लगाबमा पुनःसञ्चालन गरिएकोमा खुशी व्यक्त गर्नुभयो । उहाँले बीपी राजमार्ग यात्राका हिसाबले अन्यन्तै जोखिम रहेको र सबारी चालकले केही बेर आराम गर्न पाउदा पनि उनीहरुको थकाई मेटिने बताउनुभयो ।
पूर्वी नेपाल तथा तराईका जिल्लालाई छोटो दुरीमा राजधानी काठमाण्डौसँग जोड्ने बीपी राजमार्ग हुदै दैनिक चार हजारसम्म सबारी साधन सञ्चालन हुने प्रहरीले जनाएको छ । पूर्वी पहाडी जिल्लाहरु खोटाङ्, भोजपुर, तेह्रथुम, सङ्खुवासभा, सोलेखुम्बु, ओखलढुङ्गा लगायत तराईका जिल्लाबाट यात्रुबाहक सबारी साधन बीपी राजमार्ग हुदै राजधानी भित्रिने र बाहिरिने गर्दै आएका छन् ।
