सिन्धुली, साउन २८ । सिन्धुली जिल्लामा स्थानीय तहले धमाधम १५ शैयाको अधारभुत अस्पताल सञ्चालन गर्दै गएका छन् ।
स्थानीय तहले ‘एक स्थानीय तह, एक आधारभुत अस्पताल’ भन्ने सरकारको नीति अनुसार स्थानीयस्तरमा नै नागरिकलाई आधारभुत स्वास्थ्य सेवा दिन पछिल्लो समयमा उक्त अस्पताल सञ्चालन गर्दै गएका हुन् । यसैक्रममा गोलन्जोर गाँउपालिकाले वडा नं. ३ ग्वाल्टारमा १५ शैथ्याको अधारभुत अस्पताल भदौको अन्तिम साताबाट सञ्चालनको तयारी भई रहेको जनाएको छ ।
गाँउपालिकाका अनुसार ग्वाल्टारमा ब्याक टु लाईफ ईभि जर्मनीको आर्थिक सहयोगमा १५ शैयाको अस्पतालको भवन निर्माण सम्पन्न भएपछि उक्त अस्पताल सञ्चालनको तयारी गरिएको हो । उक्त अस्पताल सञ्चालनका लागि मदन भण्डारी स्वास्थ्य विज्ञान प्रतिष्ठान हेटौंडा र गोलञ्जोर गाउँपालिका बीच स्वास्थ्य सेवा र शिक्षामा सहकार्य गर्न साउन २२ गते सम्झौता समेत भएको गाँउपालिका अध्यक्ष शंकर बरालले जानकारी दिनुभयो ।
उक्त हस्ताक्षरपत्रमा प्रतिष्ठानको तर्फबाट उप–कुलपति डा. प्रदीप ज्ञवाली र गाउँपालिकाको तर्फबाट अध्यक्ष बरालले हस्ताक्षर गर्नु भएको छ । स्वास्थ्य विज्ञान शिक्षालाई व्यवहारिक बनाउने र गाउँस्तरसम्म गुणस्तरिय स्वास्थय सेवा विस्तार गर्ने उद्देश्यले सम्झौता गरिएको गाँउपालिका अध्यक्ष बरालले जानकारी दिनुभयो ।
सम्झौता अनुसार अब मदन भण्डारी प्रतिष्ठानका स्नातक र स्नातकोत्तर तहका विद्यार्थीले गोलन्जोर आधारभुत अस्पतालमा प्रत्यक्ष अभ्यास गर्ने अबसर पाउने छन् । यसबाट एकातिर विद्यार्थीहरुले ज्ञानलाई व्यवहारमा उतार्ने बाताबरण बन्ने छ भने अर्कातिर गाँउपालिकाका सर्बसाधारणले विशेषज्ञ चिकित्सकको सेवा गाँउमै प्राप्त गर्न सक्ने गाँउपालिकाले जनाएको छ ।
प्रतिष्ठानले अस्पतालमा आवश्यक परेमा प्राविधिक कर्मचारी पठाउने, तालिम दिने, डिजिटल स्वास्थ्य सेवाको प्रयोगलाई प्रोत्साहन गर्ने र अनुसन्धानका आधारमा स्वास्थ्य नीति निर्माणमा सघाउने प्रतिबद्धता जनाएको छ । सहकार्य पाँच वर्षका लागि हुनेछ र आवश्यकता अनुसार नवीकरण गर्न सकिने व्यवस्था गरिएको छ ।
गाँउपालिकाका अनुसार ब्याक टू लाइफ इभी जर्मनीको आर्थिक सहयोग तथा समुदाय पद्धति विकास सेवा (सीएसडीएस) सिन्धुलीको प्राविधिक सहयोगमा एआर्डी कन्ट्रक्सनले १८ महिनामा छ करोड ७६ लाख २१ हजार १३५ रुपियाको लागतमा निर्माण सम्पन्न गर्ने गरी २६ अप्रिल २०२४ मा सम्झौता गरी ग्वाल्टार आधारभुत अस्पतालको भवन निर्माण सुरु गरेको थियो । अहिले भवन निर्माण सकिएको र अस्पतालका लागि हुनु पर्ने मापदण्ड अनुसारको भवन बनेको छ । दातृ निकायले त्यो भन्दा बाहेक एक करोड रुपिया बराबरको विभिन्न किसिमको मेडिकल उपकरण पनि उपलब्ध गराएको गाँउपालिकाले जनाएको छ ।
गाँउपालिका अध्यक्ष बरालले अस्पतालका लागि हाल कार्यालय सहयोगी बाहेक ३२ जना विभिन्न तहका कर्मचारीको दरबन्दि स्वीकृत गरेको र सुरुमा एक जना एम्बिबिएस चिकित्सक र स्टाफ नर्सको व्यवस्था गरी चिकित्सक सेवा प्रारम्भ गरिने बताउनुभयो । उहाँले भन्नुभयो, ‘स्रोत र साधन जुट्दै गएपछि त्यही अनुसार जनशक्ति पनि थपिदै जानेछन् । अस्पताल पूर्णरुपमा सञ्चालन हुदा नौ जना बिषेशज्ञ चिकित्सक नै रहने व्यवस्था गरिएको छ ।’ उक्त अस्पतालले गोलन्जोरसँगै फिक्कल, सुनकोशी, रामेछाप, ओखलढुंगा र खोटाङका सीमावर्ती क्षेत्रका नागरिकलाई लक्षित गरी सेवा प्रवाह गर्ने छ ।
नौ वटा स्थानीय तह रहेको सिन्धुली जिल्लामा हालसम्म कमलामाई नगरपालिकामा सय शैथ्याको अस्पताल सञ्चालनमा रहेको छ । त्यस्तै दुधौली नगरपालिका, तीनपाटन गाँउपालिका र फिक्कल गाँउपालिकाले पनि १५ शैथ्याको अस्पतालको भवन निर्माण गरी सेवा सञ्चालनमा ल्याई सकेका छन् ।
बाँकी हरिहरपुरगढी, मरिण, सुनकोसी गाँउपालिकामा उक्त आधारभुत अस्पतालको भवन धमाधम निर्माण भई रहेको छ । घ्याङलेख गाउँपालिका–३ सोलाभञ्याङमा डिपिआर भएको वर्ष दिन वितिसक्दा पनि अस्पताल भवन निर्माणको काम अगाडी बढ्न सकेको छैन । जग्गा विवादका कारण रोकिएको निमार्ण कार्य चाडै सुल्झाएर निर्माण कार्य अगाडी बढाइने पालिकाले जनाएको छ ।
