सिन्धुली, असार १० –
सिन्धुलीको गोलन्जोर गाउँपालिकाले आगामी आर्थिक वर्ष २०८२/८३ का लागि ६२ करोड ५२ लाख रुपैयाँभन्दा बढीको बजेटसहित आफ्नो नीति तथा कार्यक्रम सार्वजनिक गरेको छ। मंगलबार सम्पन्न गाउँपालिकाको १७औँ गाउँसभामा अध्यक्ष शंकरराज बरालको अध्यक्षतामा अधिवेशन सम्पन्न भएको हो।
सभामा उपाध्यक्ष ज्वालाप्रसाद न्यौपाने (पुकार) ले आगामी वर्षको नीति, कार्यक्रम र बजेट प्रस्तुत गर्दै समग्र विकासको लक्ष्यअनुरूपको मार्गचित्र सार्वजनिक गर्नुभएको थियो। उहाँले प्रस्तुत गर्नुभएको बजेट कुल ६२ करोड ५२ लाख २ हजार ३ सय १० रुपैयाँ बराबरको छ, जसमा सामाजिक सुरक्षा, कृषि तथा पशुपालन, महिला र बालबालिका, विपद् व्यवस्थापन, खानेपानी, यातायात, सूचना प्रविधि, सरसफाइ, तथा पूर्वाधार विस्तारका कार्यक्रमहरूलाई प्राथमिकतामा राखिएको छ।
स्थानीय स्रोतको अधिकतम उपयोग र जवाफदेहितामा जोड
उपाध्यक्ष न्यौपानेले बजेट प्रस्तुत गर्दै गाउँपालिकाले नीति तथा कार्यक्रम तर्जुमा गर्दा स्थानीय आवश्यकता, जनचासो र उपलब्ध स्रोत-साधनलाई केन्द्रमा राखेको जानकारी दिनुभयो। उहाँका अनुसार बजेटको मूल मन्त्र पारदर्शिता, समन्वय, र जवाफदेही शासन प्रणाली हो। “स्थानिय स्रोतको अधिकतम प्रयोग गर्दै सहकार्य र परिणाममुखी विकास हाम्रो प्राथमिकता हो,” उहाँले भन्नुभयो।
उपस्थितिका हिसाबले उत्साहजनक सहभागिता
गोलन्जोर गाउँपालिकाको सातै वडाका अध्यक्षहरू, कार्यपालिका सदस्यहरू, प्रमुख प्रशासकीय अधिकृत चन्द्रकान्त चौधरी, पालिकाका कर्मचारी, संचारकर्मी तथा सरोकारवाला निकायका प्रतिनिधिहरूको बाक्लो सहभागिता गाउँसभा अधिवेशनमा देखिएको थियो।
गाउँसभा अधिवेशनले आगामी वर्षका लागि स्पष्ट कार्यदिशा तय गर्दै गोलन्जोरको विकास यात्रालाई थप गतिशील बनाउने प्रतिबद्धता व्यक्त गरेको छ। विशेषगरी, सामाजिक समावेशीकरण, पूर्वाधार विस्तार र दिगो विकासका कार्यक्रमहरूमा प्राथमिकता दिइनेछ।
विकासको सन्दर्भमा कार्यक्रमहरू केन्द्रित
यसपटकको बजेटले खासगरी ग्रामीण भेगका जनतालाई प्रत्यक्ष असर पार्ने योजना तथा कार्यक्रमहरूमा जोड दिएको देखिन्छ। स्थानीय तहमा आत्मनिर्भरता बढाउने उद्देश्यले कृषि उत्पादन र पशुपालन कार्यक्रमलाई सघन रूपमा अघि बढाइने जनाइएको छ। त्यस्तै, विपद् व्यवस्थापनका लागि पूर्वतयारीका काम, खानेपानीको पहुँच सुधार, सडक तथा विद्युत विस्तार, बालबालिका तथा महिलामैत्री कार्यक्रमहरू पनि प्राथमिक सूचीमा छन्।
गोलन्जोरको नयाँ यथार्थ र भावी यात्रा
गाउँसभा अधिवेशनमा प्रस्तुत नीति तथा कार्यक्रमहरूले गोलन्जोर गाउँपालिकालाई समावेशी, समतामूलक र दिगो विकासतर्फ उन्मुख बनाउने संकेत दिएका छन्। अध्यक्ष बरालले अधिवेशन समापन गर्दै सबै जनप्रतिनिधि, कर्मचारी र नागरिकबीचको सहकार्यका माध्यमबाट योजनाहरूलाई व्यवहारमा उतार्ने प्रतिबद्धता व्यक्त गर्नुभयो।
“हामीले नीति बनायौं, अब यसको कार्यान्वयनमा सबैको साथ र जिम्मेवारी चाहिन्छ,” उहाँले भन्नुभयो, “अहिलेको खाका भविष्यको समृद्ध गोलन्जोर निर्माणतर्फको जग हो।”
