काठमाडौं, असार १४
विधेयकमाथिको छलफलका क्रममा सांसदहरूले सार्वजनिक ऋणको अवस्था, ऋणको उपयोगिता, उत्पादनशील क्षेत्रमा लगानी तथा वित्तीय अनुशासनका विषयमा विभिन्न प्रश्न उठाएका थिए । छलफलपछि उठेका जिज्ञासाको जवाफ दिँदै अर्थमन्त्री डा. वाग्लेले मुलुकको आर्थिक विकास, उत्पादन तथा उत्पादकत्व वृद्धि गर्न ऋण आवश्यक रहेको बताए ।
उनले ऋण लिने मात्र नभई त्यसको प्रभावकारी उपयोगमा सरकार केन्द्रित रहेको उल्लेख गर्दै उत्पादनमूलक तथा दीर्घकालीन प्रतिफल दिने क्षेत्रमा लगानी गरिने बताए । अर्थमन्त्री वाग्लेले निजी क्षेत्र अपेक्षाअनुसार चलायमान हुन नसकेको वर्तमान अवस्थामा सार्वजनिक क्षेत्रलाई सक्रिय बनाउन बजेटमार्फत आवश्यक व्यवस्था गरिएको स्पष्ट पारे ।
उनका अनुसार सार्वजनिक लगानी मार्फत आर्थिक गतिविधि विस्तार गर्ने, रोजगारी सिर्जना गर्ने तथा निजी क्षेत्रलाई समेत पुनः चलायमान बनाउने लक्ष्य सरकारले लिएको छ । उनले सार्वजनिक वित्त आयोगले दिएका सुझाव तथा वित्तीय अनुशासनका मापदण्डलाई आधार बनाएर ऋण लिने व्यवस्था बजेटमा समावेश गरिएको जानकारी पनि संसदलाई दिए ।
अर्थमन्त्री वाग्लेले सरकारले अनावश्यक ऋणभार बढाउने नीति नलिएको उल्लेख गर्दै आर्थिक क्षमता, राजस्वको अवस्था र विकासका आवश्यकता मूल्याङ्कन गरेर मात्रै ऋण परिचालन गरिने बताए । उनले ऋणलाई खर्चमुखी नभई उत्पादन, पूर्वाधार निर्माण र आर्थिक वृद्धि हुने क्षेत्रमा परिचालन गरिने प्रतिबद्धता व्यक्त गरे ।
प्रतिनिधिसभाबाट पारित भएको राष्ट्र ऋण उठाउने विधेयक अब संविधानबमोजिम राष्ट्रियसभामा छलफल तथा पारित प्रक्रियाका लागि पठाइनेछ ।
