सिन्धुली, भदौ १० । सिन्धुली जिल्लाको कमलामाई नगरपालिका–१२ स्थित जनजागृती मावि टंसार पहिरोका कारण जोखिममा परेको छ ।
अबिरल बर्षाका कारण भदौ ५ गते विद्यालयको आठ कोठे पक्कि भवन निर्माण गरेको जमिन पहिरोबाट धसिएर जोखिममा परेको हो । पहिरोले विद्यालयको घेराबेरा भत्किएको र भवन पहिरोले तान्ने (झार्ने) अवस्था रहेको विद्यालयका प्रधानाध्यापक कनक भुजेलले जानकारी दिनुभयो ।
विद्यालयको आँगनमा गएको पहिरो झरेर तल रहेको ज्ञानरथ जोगिको घर समेत पुरेर क्षती गरेको उहाँले सुनाउनुभयो । उहाँले भन्नुभयो, ‘पानी नपरेको बेला त पढाउन कुनै समस्या भएन । पानी पर्न थाल्यो भने विद्यार्थीलाई कक्षा कोठाबाट निकालेर सुरक्षित गर्नु पर्ने अवस्था छ ।’ अहिले विद्यार्थीलाई त्यही पहिरोको जोखिममा रहेको भवनमा राखेर पढाउनु पर्ने बाध्यता रहेको प्रधानाध्यापक भुजेलको भनाई छ ।
उहाँका अनुसार तत्काल पहिरो नियन्त्रण गरी विद्यालय भवन सुरक्षित गर्नका लागि वडा कार्यालयको सिफारिस सहित नगरपालिाकालाई जानकारी गराउने काम भएको छ । पहिरोबाट भवन जोखिममा पर्दा अध्ययनरत १३० जना विद्यार्थीको पढाई प्रभावित भएको छ । उक्त भवन २०७० सालतिर निर्माण भएको हो ।
