कमलामाई नगरपालिकामा गर्मीका कारण विद्यालयहरू शुक्रबारसम्म बन्द

सिन्धुली, जेठ २७

– हालको अत्यधिक गर्मीका कारण सिन्धुलीको कमलामाई नगरपालिकाभित्रका सम्पूर्ण विद्यालयहरू बुधबार देखि शुक्रबार सम्मका लागि बन्द हुने भएका छन् । नगरपालिकाले मंगलबार एक सूचना जारी गर्दै विद्यालय बन्दको जानकारी गराएको हो ।

नगरपालिकाले पछिल्लो समय अत्यधिक तापक्रम बढ्दै गएपछि बालबालिकाहरूमा स्वास्थ्य समस्या देखिन थालेको जनाउँदै पठन पाठन मात्र नभई जनस्वास्थ्यमा समेत असर पर्ने भन्दै यस्तो निर्णय लिएको बताएको छ ।

“गर्मीका कारण बालबालिका बिरामी पर्न थालेकाले विद्यालय बन्द गर्न लागिएको हो, ” कमलामाई नगरपालिकाको सूचनामा उल्लेख छ । साथै, बन्द गरिएका दिनहरू वर्षे विदाबाट कट्टा गरिने पनि जनाइएको छ ।

नगरपालिकाले मौसम अनुकूल भएसँगै विद्यालय पुनः सञ्चालन गरिने जानकारीसमेत दिएको छ ।