सिन्धुली, तिनकन्या —
पोषण तथा उत्थानशील जीविकोपार्जन परियोजनाअन्तर्गत तिनकन्याको माझकुभिण्डेमा निर्माण गरिएको खानेपानी आयोजना, सामाजिक कोष अन्तर्गत गठित समूहको बैठक मंच, स्वास्थ्य संस्थाहरूमा प्रदान गरिएका सामग्री, र आयआर्जनका लागि बाख्रापालन किसानहरूलाई खोर निर्माणमा दिइएको सहयोग लगायतका कार्यक्रमहरूको टोलीले स्थलगत अनुगमन गरेको हो ।
अनुगमन टोलीमा गाउँपालिकाका उपाध्यक्ष ज्वाला प्रसाद न्यौपाने, प्रमुख प्रशासकीय अधिकृत चन्द्रकान्त चौधरी, वडा अध्यक्ष भक्त बहादुर भुजेल, सिड्स नेपालका उपाध्यक्ष कृष्णहरी थापा, परियोजनाका अधिकारी, सञ्चारकर्मीहरू र सरोकारवाला सहभागी थिए ।
परियोजना अधिकृत सागर धितालका अनुसार माझकुभिण्डेमा १ इन्टेक संरचना, १ रिजर्भ ट्यांकी र २० वटा घरधुरीमा खानेपानीका धारा निर्माण गरिएको छ । यस आयोजनाबाट १०५ स्थानीय बासिन्दा प्रत्यक्ष लाभान्वित हुनेछन् ।
अनुगमनका क्रममा उपाध्यक्ष न्यौपानेले सिड्स नेपालद्वारा सञ्चालित योजनाहरू स्थानीय जनताको जीविकोपार्जनमा प्रत्यक्ष योगदान पुर्याउने खालका अत्यन्तै प्रभावकारी प्रयास भएको बताउनुभयो ।
सामाजिक विकास, स्वास्थ्य प्रवर्धन र दिगो जीविकोपार्जनलाई एकसाथ समेटिएको यस किसिमको परियोजनाले ग्रामीण समुदायमा सकारात्मक परिवर्तन ल्याउने अपेक्षा गरिएको छ ।
