सिन्धुली, जेठ १६
सिन्धुली जिल्लाको हरिहरपुरगढी गाउँपालिका वडा नं. २ झनझनेस्थित मदन भण्डारी राजमार्गमा रहेको प्रहरी चेकपोष्टबाट करिब १०७ किलो लागू औषध गाँजासहित सिमेन्ट लोड गरिएको पिकअप गाडी नियन्त्रणमा लिइएको छ ।
बिहान करिब ४ बजेको समयमा प्रहरी निरीक्षक प्रकाश भण्डारीको कमाण्डमा खटिएको प्रहरी टोलीले चेकजाँचको क्रममा रौतहट जिल्ला, गरुडा नगरपालिका वडा नं. ४ का अन्दाजी १९ वर्षीय गोपाल साहले चलाएको प्रदेश २–०३–००१ च. ५६७१ नम्बरको बलेरो पिकअप गाडीमा लागू औषध गाँजा फेला पारेको हो ।
गाडीमा सिमेन्टका बोरा राखिएको देखिएपनि ती बोरा मुनि लुकाई–छिपाई राखिएको ७ पोका लागू औषध गाँजा बरामद गरिएको जिल्ला प्रहरी कार्यालय सिन्धुलीले जनाएको छ। तौल गर्दा कुल १०७.११ किलो गाँजा रहेको पुष्टि भएको प्रहरीले जनाएको छ ।
बरामद गरिएको गाँजा, चालक साह र सवारी साधनलाई नियन्त्रणमा लिएर जिल्ला प्रहरी कार्यालय सिन्धुलीमा ल्याइएको तथा आवश्यक अनुसन्धान कार्य भइरहेको प्रहरीको भनाइ छ ।
प्रहरीका अनुसार लागू औषध ओसारपसारमा संलग्नहरूलाई कारबाही गर्न कडा निगरानी जारी राखिएको छ ।
