सिन्धुली जिल्ला प्रहरी कार्यालयले आर्थिक वर्ष २०८१/८२ मा कर्तव्य ज्यान, लागू औषध, आत्महत्या र सवारी दुर्घटनासम्बन्धी प्रमुख घटनाहरूको विवरण सार्वजनिक गरेको छ। प्रहरीले अपराध नियन्त्रणमा सक्रियता देखाए पनि आत्महत्याका घटना स्थिर छन्।
सिन्धुली, साउन १५ । आर्थिक वर्ष २०८१/८२ मा सिन्धुली जिल्लामा आपराधिक गतिविधिहरूको प्रवृत्ति अघिल्ला वर्षहरूमा देखिएको तुलनामा स्थिर देखिए पनि केही घटनाहरूको संख्या र स्वरूपले थप चुनौतीको सङ्केत गरेका छन् । जिल्ला प्रहरी कार्यालय, सिन्धुलीले साउन १५ गते आयोजित पत्रकार सम्मेलनमार्फत सार्वजनिक गरेको तथ्यांक अनुसार आत्महत्या, लागू औषध, जबर्जस्ती करणी र सवारी दुर्घटनाका घटनाहरू मुख्यरूपमा प्रहरीको ध्यान केन्द्रित हुने मुद्दा बने ।
गत वर्ष (२०८०/८१) मा १७५ जना सवारी दुर्घटनामा घाइते भएका थिए भने २०८१/८२ मा यो संख्या बढेर २०५ पुगेको छ । दुर्घटनाको वृद्धि मुख्यतः राजमार्गमा बढ्दो सवारी चाप, लापरवाह ड्राइभिङ र रात्रीकालीन यात्रामा देखिएको कमजोरीका कारण भएको अनुमान गरिएको छ । प्रहरीले सडक सुरक्षा सम्बन्धी जनचेतनामूलक कार्यक्रमहरू सञ्चालन गरे पनि दुर्घटनाको संख्या नियन्त्रणमा आउन सकेको छैन ।
लागू औषध सम्बन्धी अपराधका घटनाहरू पनि जिल्लामा स्थिर रहेका छन् । गत आर्थिक वर्षमा दर्ता भएका मुद्दाहरूको संख्या, प्रतिवादीहरूको संलग्नता र बरामद गरिएका लागू औषधको परिमाणले सिन्धुली हुँदै राजधानी प्रवेश गर्ने मार्गको संवेदनशीलता देखाउँछ । भिमान चेकपोष्ट र आसपासका स्थानहरू लागू औषध तस्करीका लागि प्रयोग भएको प्रहरी स्रोतहरू बताउँछन् ।
हत्या र जबर्जस्ती करणीका घटनाहरूमा खासै उकालो नचढे पनि उनीहरूलाई नियन्त्रण गर्न प्रहरीले व्यापक अनुसन्धान तथा निगरानी राखिरहेको छ । कर्तव्य ज्यान मुद्दामा प्रहरीको फर्छ्यौट दर सन्तोषजनक रहेको छ । जबर्जस्ती करणीका मुद्दाहरूमा भने पीडितको न्याय सुनिश्चित गर्न विशेष सतर्कता अपनाइएको छ ।
आत्महत्याका घटनाहरूमा उल्लेखनीय कुरा के छ भने अघिल्लो वर्षको जस्तै ८१ वटा आत्महत्याका घटना दर्ता भएका छन् । विष सेवन र झुन्डिएर आत्महत्या गर्ने प्रवृत्ति दुवै देखिएको छ । समाजमा बढ्दो मानसिक तनाव, आर्थिक असहजता, परिवारभित्रको सहकार्यको अभाव र नशा दुव्र्यसनले आत्महत्याको दर स्थिर रहन सक्ने जोखिम देखिएको प्रहरीको निष्कर्ष छ ।
महिला, बालबालिका र जेष्ठ नागरिक सम्बन्धी उजुरीका घटनाहरू पनि प्रहरी समक्ष आइपरेका छन् । यस्ता उजुरीको संवेदनशीलताका कारण यिनको विस्तृत विवरण सार्वजनिक नगरिएको भए पनि पीडित–मैत्री दृष्टिकोणबाट अनुसन्धान गरिने प्रहरीको भनाइ छ । हराएका तथा फेला परेका मानिसहरूको विवरण पनि यो वर्ष प्रहरीले व्यवस्थापन गर्न सक्ने स्थिति बनाएको उल्लेख गरिएको छ ।
एक उल्लेखनीय बिन्दु भनेको राजस्व कारबाहीतर्फ देखिएको उच्च वृद्धि हो । अघिल्लो वर्ष (२०८०/८१) मा रु १ करोड ७६ लाख ९१ हजार ८५ राजस्व संकलन भएकोमा यो वर्ष (२०८१/८२) त्यो वृद्धि भई रु २ करोड ७७ लाख ३६ हजार ४४३ पुगेको छ । भन्सार छल, अवैध मालसामान र बिलबिनाको कारोबार नियन्त्रणमा प्रहरीको सक्रियता रहेकाले यो परिणाम आएको अनुमान गर्न सकिन्छ ।
जिल्ला प्रहरी कार्यालयले सामुदायिक प्रहरी साझेदारी, विद्यालयस्तरीय सचेतना कार्यक्रम, ट्राफिक जनचेतना, साइबर अपराध विरुद्धको शिक्षा र महिला–बालबालिका सम्बन्धी सहायता कार्यक्रमहरूलाई प्राथमिकतामा राख्दै आगामी वर्ष अपराध न्यूनीकरणमा थप ध्यान दिने बताएको छ ।
प्रहरी नायब उपरीक्षक सूर्य प्रकाश सुवेदीले पत्रकार सम्मेलनमा भन्नुभयो, “हामी समुदायसँग सहकार्य गर्दै हरेक अपराधका विरुद्ध संवेदनशील, प्रभावकारी र व्यावसायिक ढङ्गबाट काम गर्न प्रतिबद्ध छौं। समाजको शान्ति, सुरक्षा र सेवा प्रवाहलाई सुदृढ बनाउने हाम्रो प्रयास जारी छ ।”
जिल्ला प्रहरीको विस्तृत विवरणले सिन्धुलीमा एकातर्फ अपराध न्यूनीकरणको निरन्तर प्रयास देखाउँछ भने अर्कोतर्फ आत्महत्या, लागू औषध र सवारी दुर्घटनाजस्ता दीर्घकालीन समाधान खोज्नुपर्ने विषयलाई पनि उजागर गर्छ । प्रहरीको प्रयास तब मात्र सार्थक हुन्छ जब समुदाय, विद्यालय, परिवार र राज्य संयन्त्रले पनि आ–आफ्नो भूमिका इमान्दारीपूर्वक निर्वाह गर्नेछन् ।
