सिन्धुली, भदौ ३ ।
गत आर्थिक बर्ष ०८१/०८२ मा सङ्घिय, प्रदेश र स्थानीय सरकारले लगानी गरी निर्माण गरेका दर्जनौ सडक बर्षाका र निर्माणको क्रममा भएको लपार्बाहीका कारण यतिखेर भत्किएर लथालिङ् अवस्थामा रहेको छ । बिनियोजित रकम सक्नका लागि जथाभावि सडक निमार्ण गरिदा यो समस्या आएको स्थानीय बसिन्दाको गुनासो छ ।
बागमती प्रदेश सरकारले करोडौ रुपिया खर्च गरि सकेको बीपी राजमार्ग अन्तर्गत कमलामाई नगरपालिकाको वडा नं. २, ४ र ७ हुदै निर्माण भई रहेको चियाबारी–केवरे–बाँसकटेरीसम्मको १२ किलो मिटर लम्बाईको सडक यतिखेर सबारी साधन सञ्चालन हुन सक्ने अवस्थामा छैन । उक्त सडक निर्माणका क्रममा बिगत चार बर्षदेखि बर्षको झण्डै दुई करोड रुपियाका दरले गत आर्थिक बर्ष ०८१÷०८२ सम्ममा आठ करोड खर्च भई सके पनि काम राम्रो नभएको केवरे निवासी कुमार श्रेष्ठ बताउनुहुन्छ ।
उहाँले भन्नुभयो, ‘ठेकेदारले राम्रो काम नगरेपछि चित्त नबुझेर हामीले कति पटक वाल (पर्खाल) भत्काई दिई सक्यौं ? अहिले बनेको वाल पनि उस्तै बनेको छ । परेको पैसामा आधामा ठेक्का हाल्ने र ठेकेदारले आफु उक्सिने मात्रै काम भई रहेको छ । समस्या कस्ले सुन्ने ?’ चालु आर्थिक बर्षका लागि पनि बागमती प्रदेश सरकारले उक्त सडकका लागि दुई करोड रुपिया बिनियोजन गरेको उहाँले जानकारी दिनुभयो ।
हालसम्म करोडौ रुपिया लगानी भई सकेको चियाबारी–केवरे–बाँसकटेरी सडकमा सबारी साधन सञ्चालन गर्नका लागि बर्षाको मौसम सकिएर हिउद महिना नै कुर्नु पर्ने बाध्यता रहेको स्थानीयको गुनासो छ । त्यस्तै बीपी राजमार्गकै खनियाखर्कदेखि धापचौकीसम्मको २६ किलोमिटर सडकको अवस्था पनि भत्किएर निकै दयनिय अवस्था रहेको छ ।
‘बर्सेनि किसानको २९÷३० करोडको जुनार बोकेर हिड्ने खनियाखर्क–धापचौकी सडकको अवस्था यतिखेर नाजुक छ,’ हिर्दिङ् निवासी बिनोद थापाले भन्नुभयो, ‘खनियाखर्कबाट पाँच किलोमिटरसम्म न्युन गुणस्तरको कालोपत्रे सडक बनेको छ । त्यसपछि उक्त सडकको कन्तबिजोक नै छ । पाँच बर्षजति भयो, राजमार्गबाट भित्र छिर्ने यो मूल सडकमा कुनै पनि निकायले बजेट हालेको छैन ।’
अहिले त्यो सडक स्थानीय आफैले कोदालाले खाल्डा पुरेर, भल तर्काएर, कुलेसा काटेर जसोतसो मर्मत गरि रहेको उहाँको गुनासो छ । बजेट बितरण असमानता, पाटीको पँहुचको आधार र नेताको घरको ढोकासम्म पुग्ने शाखा सडकमा बजेट ओईराउदा मुख्य सडक ओझेलमा परेको उहाँले सुनाउनुभयो ।
त्यसो त सिन्धुली जिल्लामा पुर्वाधार विकास कार्यालयले बागमती प्रदेश सरकारको सहयोगमा गत आर्थिक बर्ष ०८१÷०८२ मा मात्रै बहु बर्षिय र सालबसाली योजना गरी ७२ वटा सडक निर्माणका योजना सञ्चालन गरेकोमा ५१ वटा सम्पन्न गरेको छ । सम्पन्न हुन नसकेकोमा बिगतदेखि निर्माण हुदै आएका अधिकांस बहुबर्षिय सडक योजना रहेको कार्यालयले जनाएको छ ।
जिल्ला समन्वय समितिका प्रमुख कारर्साङ् लामा पनि सडक निर्माणका नाममा राज्यले गरेको लगानी व्यर्थ जस्तै देखिएको बताउनुहुछ । उहाँले भन्नुभयो, ‘हेर्दा सडक निर्माणको काम भई रहेको जस्तो पनि देखिन्छ, तर दिगोपना छैन । काममा गुणस्तर पनि देखिदैन ।’ धेरै जसो सडकमा सफा गरेपछि हिउदमा यातायातका साधन सञ्चालन हुने र बर्षा लागेपछि बिग्रिएर ठप्प नै हुने उहाँले जानकारी दिनुभयो ।
पालिकाले बनाएको सडकमा बढी समस्या देखिएको उहाँको भनाई छ । सडक निर्माणको काम समयमा सुरु नहुने र बिजियोजित बजेट सिध्याउन आर्थिक बर्षको अन्तिमतिर आएर काम गर्ने परिपाटीले पनि समस्या देखिएको समन्वय समितिका प्रमुख लामाको भनाई छ ।
